صالح امین پناه

هاوڕی ساڵەحی ئەمین پەنا ساڵی ١٣٤٢ی هەتاوی لە نێو بنەماڵەیەکی زەحمەتکێشی گوندی”تاتەڕەش”ی سەر بە شاری سنە چاوی بە ژین پشکووت.
خوێندنی سەرەتائی لە شاری سنە تەواو کرد و بە هۆی دەست تەنگی و باری گوزەرانی بنەماڵەکەیان نەیتوانی درێژە بەخوێندن بدات.
ئەگەر چی تەمەنی کەم بوو بەڵام ڕووی کردە بازاڕی کارو دەستی دایە کار کردن.
کاتی خرۆشانی تووڕەئەی و ناڕەزایەتی گەلانی ئێران لە دژی ڕژیمی پەهلەوی هاوڕێ ساڵەح تازە لاوێک بوو کە هاتە ڕیزی خۆپیشاندەران و ژیانی تێکەڵاوی خەباتی سیاسی بوو.
پاش ڕووخانی ڕژیمی شا و بە دەست پێکردنی ئاشکرای کارو چالاکاییەکانی کۆمەڵە لە بنکەی گەڕەکی حاجی ئاوای شاری سنە پەیوەندی بە کۆمەڵەوە گرت و لە ڕێبازی سۆسیالیستی دا دەستی بە خەبات و تێکۆشان کرد.
لە جەریانی هێرشی ڕژیم بۆ سەر شاری سنە لە بەهاری ساڵی ٥٩دا شان بە شانی خەڵکی ئازادیخواز و هێزی پێشمەرگەی کۆمەڵە لە خۆڕاگری و قارەمانیەتی ئەم شارە لە بەرامبەر هێزەکانی ڕژیمی ئیسلامی چالاکانە هەڵسووڕا.
لەم دەورانە بە دواوەوە یەکجاری لە ڕیزی پێشمەرگەکانی کۆمەڵەدا مایەوە و لەو پەڕی فیداکاری و دڵسۆزیەوە ئەرکەکانی بە جێ دەهێنا.
ساڵی ٦١ بە مەبەستی مەئموریەتێکی تەشکیلاتی نێردرایە شاری سنە و پاش ماوەیەک لە لایەن هێزەکانی ڕژیمەوە شناسائی کرا و لە گەڵ یەکێک لە هاوڕێیانی دەستگیر و ڕەوانەی زیندان کران.
ئەشکەنجە گەرانی ڕژیم کە هیچ بۆنێکیان لە ئینسانیەت نەبردووە بۆ ماوەی یەک مانگ هاوڕێ ساڵەحیان بە توندترین شێوە ئازاردا و نەیان توانی لێوی نهێنی پارێزی کە لە دڵ و دەرونێکی لێوانڵیوی لە عەشق بە ئازادی و وەفاداری بۆ ئامنجەکانی فەرمانی وەردەگرت بکەنەوە. ئەو کۆمۆنیستە خۆڕاگرە تەنیا ١٩ ساڵ تەمەنی بوو ئەشکەنجەگەرانی خۆی بە چۆک داهێنا و خۆی بوو بە قارەمانی موقاوەمەت و ئەوانی سەرشۆڕ و ڕیسوا کرد.جەلادانی پاڕیزەری نیزامی چەوسێنەری سەرمایەداری و ڕژیمی ئیسلامی هاوڕێ ساڵەحی ئەمین پەنا پێشمەرگەی ووشیارو فیداکاری کۆمەڵەیان لە زیندان دا ئیعدام کرد.
بە درێژە پێدان بە ڕێگای پیرۆزی ڕێز لە یادی ئازیزو خۆشەویستی دەگرین.

.